Në bazë të përditësimit të fundit nga ISHP ditën e djeshme, në vendin tonë janë 76 persona të infektuar nga COVID-19, teksa ditën e sotme janë regjistruar 3 raste të reja, mirëpo nuk dihet ende sa mund të jetë numri total i të prekurve.
Mjeku Tritan Kalo ka treguar së fundmi se 4 prej pacientëve janë në gjendje mesatarisht të rëndë dhe e kanë të domosdoshme t’i nënshtrohen terapisë intesive.
Në një bisedë me ministren e Shëndetësisë, Ogerta Manastirliu, mjeku tregoi se Infektivit po i shtohen kapacitetet, ku aktualisht janë 16 vende që kanë respiratorë.
“Të sëmurët në reanimacion janë në një gjendje mesatarisht të rëndë por që e kanë të domosdoshme praninë në mjedisë të terapisë intensive, pasi në çdo moment mund të bëhen objekt i ventilimit mekanik. Aktualisht është 12+4, plus është dhe një kat i veçantë i cili është parashikuar që 24 poste të jenë tashmë të pajisura për të vendosur ventilatorë në një moment nëse do të kemi shtrirje të formave të rënda të infeksionit tek këta të sëmurë dhe shkon pothuajse tek 36-40 poste të asistencës respiratore brenda strukturës së infektivit. Urojmë që të mbetemi në këto kapacitete për të mirën e njerëzve, pavarësisht se janë parashikuar dhe COVID 2 dhe skenare të tjerë”, tha Kalo.
Nga ana tjetër, Manastirliu ka vlerësuar frymën e ekipit të Infektivit dhe sakrificën që po bëjnë në shërbim të të sëmurëve me COVID-19, teksa Kalo është shprehur se vetëm përforcimi i masave në vendin tonë dhe ndërgjegjja individuale për të respektuar largimin social, mund të shmangë skenarët e ngjashëm me Italinë për infektimin nga COVID-19.
“Jam shumë dakord për masat e marra për distancimin social, është mirë që janë përforcuar, në mendimin tim mund edhe të përforcohen më tepër. Sepse është e vetmja mundësi që u tregua efikase në eksperiencën kineze në ngadalësimin e sëmundjes dhe mbi të gjitha për ta shuar atë gradualisht. Nëse do të tregoheshim liberal, siç u treguan fqinjët tanë në Itali, me tej britanikët e spanjollët, kjo do të bëntë të shfaqeshin në vendin tonë skenarë të ngjashëm me to”, tha Kalo.
https://www.facebook.com/168952600227465/posts/911952025927515/
Nga momenti në moment pritet që Instituti i Shëndetit Publik të bëjë përditësimin e personave të infektuar dhe viktimave ( nëse ka).
