Mjeku gjinekolog Shkëlqim Balili ishte i ftuar këtë mëngjes në emisionin “Koha për t’u zgjuar”, ku foli për përhapjen në rritje të sëmundjeve seksualisht të transmetueshme, me theks të veçantë tek sifilizi.
Sipas tij, kjo sëmundje po rikthehet në mënyrë shqetësuese, dhe rastet janë shtuar ndjeshëm kohët e fundit.
Balili i bëri thirrje institucioneve përgjegjëse që të ndërhyjnë urgjentisht për të frenuar këtë situatë, duke theksuar se një nga faktorët kryesorë të përhapjes është ardhja në vend e punonjëseve të seksit nga jashtë, fenomen që ai e cilësoi si turizëm seksual.
Ai kujtoi se në të kaluarën, veçanërisht në shekullin XIX, sifilizi ishte sëmundja më e përhapur veneriane.
Sot, ndonëse fokusi i shëndetësisë është zhvendosur drejt kancereve, diabetit dhe sëmundjeve metabolike, sëmundjet seksualisht të transmetueshme nuk janë zhdukur.
“Janë mbi 20 mikrobe që shkaktojnë këto sëmundje, dhe shumë prej tyre nuk japin simptoma në fazat e para, çka e bën përhapjen më të lehtë”, theksoi ai.
Sipas Balilit, sifilizi kalon në disa faza, fillimisht një periudhë inkubimi pa shenja të dukshme, më pas shfaqen njolla të dhimbshme në pëllëmbë të duarve dhe shputa të këmbëve, dhe nëse nuk trajtohet, infeksioni mund të depërtojë në sistemin limfatik dhe të bëhet vdekjeprurës.
Mjeku i bëri thirrje të rinjve të praktikojnë marrëdhënie seksuale të sigurta dhe të shëndetshme, duke shmangur partnerët e shumtë dhe sjelljet e rrezikshme.
Ai u shpreh hapur kundër praktikave si seksi anal dhe oral, të cilat i quajti “perversitete”, ndërsa theksoi domosdoshmërinë e kontrollit të shëndetit seksual:
“Vizitat tek gjinekologu dhe kryerja e pap-testit një herë në vit duhet të jenë pjesë e rutinës për çdo grua”.
Në përfundim, Balili kërkoi angazhim serioz të shtetit dhe fushata ndërgjegjësuese për parandalimin e përhapjes së sifilizit dhe sëmundjeve të tjera seksualisht të transmetueshme.
