Ndryshe nga sa parashikuan mjekët se piku i Covid-19 në vendin tonë kishte kaluar dy javë më parë, të shtunën që lamë pas u regjistrua numri më i madh i rasteve të reja, teksa dita-ditës kurba ka luhatje.
Mjeku Tritan Kalo e cilëson kurbën në vendin tonë si në formën e sharrës, e cila nuk është as e sheshtë, por nuk ka asnjë pikë shpërthimi ekstrem.
Në një intervistë për Abc News ai tha se kjo na kujton që të jemi gjithnjë vigjilent, teksa lidhur me spekulimet se numri i viktimave nga koronavirusi në vendin tonë është me i madh, mjeku tha se manipulimi i shifrave është i pamundur.
Ndërsa, lidhur me lehtësimin e masave, ai tha se ka ardhur për shkak se numri i rasteve të infektuara ka shfaqur një tendencë në ulje.
“Problemi është se jemi në një kurbë e cila varion në katër raste. Është një kurbë në formë sharre. nuk ka pasur kurrë kulme, por i bie të jetë diçka e dhëmbëzuar por pa shpërthime ekstreme. Virusi është i pranishëm. Na tregon që duhet të jemi gjithmonë vigjilent.Tendenca e hapjes vjen nga fakti se numri i rasteve ka një tëndencë pozitive rënie në të gjitha vendet. Numri i rasteve të konfirmuar nuk do të thotë se nuk ka më shumë të ifnektuar sepse shumë njerëz janë asimptomatikë dhe vetëm studimet e mëvonshme do nxjerrin shifra më të sakta.
Shifrat nuk mund të manipulohen kurrë. Një gjë e tillë është e pamundur. Ka mënyra për t’u vërtetuar. Sa më shumë shtohet numri i testiemeve, aq më shumë plotësohet përqindja. Problemi kryesor është të mos testohen në testim ata që kanë simptoma dhe ata që kanë kontakte me personin e sëmurë apo edhe me kontaktin e personit të sëmurë”, tha Kalo.
Sakaq, për tre ushtarakë të KFOR-it të infektuar me Covid-19, mjeku tha se janë në gjendje të stabilizuar dhe paraqitjen me shenja të mesme, jo të rënda klinike.
“Janë testuar pozitivë. Janë nga Korça. Ata që janë në spital kanë elementë klinikë, kanë temperaturë, kollë, djersë dhe dhimbje gjoksi. Ata janë në gjendjen mes mesatares, jo me shenja të rënda”, tha Tritan Kalo.
