Insektet, veçanërisht në stinën e ngrohtë, përbëjnë një rrezik të shtuar për reagime alergjike, që në disa raste mund të jenë edhe të rënda.
Mjekja alergologe-imunologe, Alketa Bakiri, në një intervistë për emisionin People në Euronews Albania, theksoi rëndësinë e kujdesit të veçantë ndaj pickimeve të grerëzave dhe bletëve, të njohura ndryshe si himenopterë.
“Me ngrohjen e motit, edhe pse hasen gjatë gjithë vitit, reaksionet ndaj tyre janë shumë të rënda, janë shkaktare kryesore të reaksioneve anafilaktike. Ideja është që ti gjendesh në një mjedis, duke ngrënë diçka apo thjesht duke parë lulet dhe pickohesh”, tha Bakiri.
Sipas saj, simptomat mund të fillojnë me skuqje apo ënjtje të lehtë, por brenda një kohe shumë të shkurtër, gjendja mund të përkeqësohet në mënyrë të rrezikshme për jetën.
“Nisin manifestime klinike… mund të çojë në vështirësi në frymëmarrje, të përziera, dhimbje barku, duket sikur nuk shikon dhe papritmas humb ndjenjat, sidomos nga pickimi i bletëve dhe grerëzave. Të gjitha këto shenja shfaqen brenda 20 minutave dhe mund të çojë në humbje jete, derisa mund të ndodhë humbje ndjenjash, arrest respirator, mund të ndodhë që pacienti të vijë pa puls, pa tension. Mund të ndodhë të ketë humbur ndjenjat dhe nuk është koshient”, shtoi mjekja.
Bakiri rekomandoi që çdo person që përjeton reagime të tilla duhet të kërkojë menjëherë ndihmë mjekësore dhe të ndjekë një konsultë me specialistin.
