Të tjera detaje vijojnë të zbulohen nga ngjarja e rëndë në Ferizaj, ku 18-vjeçarja Marigona Osmani u dhunua për vdekje nga partneri i saj. Ende nuk është bërë publik raporti i autopsisë, por një çertifikate nga Mjekësia Ligjore e Kosovës, i është dorëzuar familjes së viktimës.
Kështu është shprehur Nazlije Balaj, këshilltare në Ministrinë e Drejtësisë, e cila zbuloi se në atë çertifikatë përmendet qartë se në rastin e vrasjes së 18-vjeçares, ka të bëjë me politraumë.
”Nuk ka ende raport të autopsisë, por ka çertifikatë të autopsisë. Sepse raporti i autopsisë përmbyllet kur të mbyllen të gjitha analizat laboratorike. Çertifikata e autopsisë, i lëshohet familjes, dhe në të është e shkruar qartë dhe saktë se në këtë rast kemi të bëjmë me Politraumë.
Është një rast shumë i rëndë. Ka të bëjë me thyerje të gjymtyrëve, shkurt shqip, një lloj dhune e përdorur që e ka shkaktuar edhe vdekjen e saj, mirëpo raporti i autopsisë do ta tregojë qartë dhe saktë, shkakun e vdekjes, kohën e vdekjes, mjetet të cilat janë përdorë për vdekje, ndërsa analizat laboratorike i dhanë të dhënat tjera të cilat janë të domosdoshme kur kryhet një autopsi dhe raport i cili i dërgohet prokurorisë për hetime të mëtutjeshme”, u shpreh Balaj për Klan Kosova.
