Policia e Shtetit ka shpallur në kërkim ndërkombëtar Fadi Alwan, i dyshuar për vrasjen e 24-vjeçares Rayyan Alwan.
Hetimet janë në bashkëpunim me INTERPOL-in për të lokalizuar dhe kapur 49-vjeçarin, i cili dyshohet se ka ikur nga Greqia dhe mund të ndodhet në Holandë ose Gjermani.
Trupi i pajetë i 24-vjeçares ndodhet ende në morg, dhe familjarët pritet të paraqiten për ta tërhequr, ndërsa pritet rezultati i ekspertizës mjeko-ligjore për të përcaktuar kohën e vdekjes. Policia shqiptare ende nuk ka mundur të kontaktojë me familjarët.
Fillimisht u dyshua se autori mund të ishte bashkëshorti i viktimës, por hetimet kanë zbuluar se ai është babai i 24-vjeçares.
Ky detaj ka shtuar mister në ngjarjen dhe ka ndryshuar rrjedhën e hetimit dhe mundësitë për motivet.
Rayyan Alwan dhe babai i saj, Fadi Alwan, kishin mbërritur në Shqipëri më 19 shkurt nga Gjermania dhe udhëtuan drejt aeroportit të Rinasit.
Dyshohet se ata janë prezantuar si çift dhe rezervuan një shtëpi me qira pa paraqitur dokumente identifikimi. Motivet e vrasjes mbeten ende të paqarta.
