Një shtetas shqiptar është gjetur i pajetë ditën e djeshme në Holandë, në Amsterdam. Ai është gjetur i mbytur në kanalin e Amsterdam-Rhein pranë Nigtevechtit, nga një kalimtar.
Dyshohet se viktima është Festim Lato. Ky i fundit është presidenti i vetëshpallur i Republikës së Çamërisë.
Fillimisht u dyshua se trupi i pajetë ishte i një polaku, por më pas rezultoi se bëhej fjalë për biznesmenin shqiptar, i cili jetonte prej 25 vitesh në Holandë.
Sipas medias “De Gelderlander”, Lato ishte kreditor për një kohë të gjatë dhe ishte deklaruar nga gjykata në Zutphen i falimentuar.
Lato ishte dënuar disa herë për mashtrim, kjo pas disa denoncimeve nga shumë persona. Edhe në Kosovë madje ishte akuzuar disa herë për mashtrim për disa mijëra euro.
Edhe mediat holandeze shkruajnë se ai kishte marrë borxh shuma të mëdha parash që nuk kishte mundur dot t’i shlyente.
Një mik i Festim Latos e konfirmoi vdekjen e tij te media “Gelderlander”. Ai i tha gazetës se ai kohët e fundit e takonte shpesh dhe nuk kishte arsye të besonte se do t’i ndodhte ndonjë gjë e keqe.
Në shkrimin e publikuar thuhet se Lato ishte i përfshirë në punëra të dyshimta. Këtë e ka shprehur diplomati holandez Jeroen Zandberg i UNPO.
Kjo e fundit është një organizatë e bazuar në Hagë për vendet, rajonet dhe popujt e papërfaqësuar.
