Policia kufitare e Vlorës ka ndërhyrë për të ndaluar një rast të dyshuar të trafikut të lëndëve narkotike, pasi informacionet e marra tregonin për një mjet të dyshuar që mund të kryente lëvizje të paligjshme mes Shqipërisë dhe Italisë.
Gjatë kontrolleve të kryera në zonë, forcat kufitare zbuluan mbi 3000 litra karburant në ishullin e Sazanit, që dyshohet se do të përdorej nga një mjet lundrues për transportin e lëndëve narkotike.
Pasi konstatuan rezervat e karburantit, autoritetet nisën identifikimin e drejtuesve të mjeteve ujore, duke i regjistruar në një sistem që, sipas burimeve, kishte munguar prej vitesh.
Megjithëse mjeti i dyshuar nuk u kap dhe rasti mbeti në tentativë, hetimet janë tashmë në vijim për të zbuluar se kush e transportoi karburantin në ishull dhe cili ishte qëllimi i vërtetë i dërgimit të tij. Sipas policisë, ngjarja ka ndodhur katër ditë më parë.
