Me urdhrin e një komisari policie mund të mbikëqyret cdo qytetar. Komisioni i Ligjeve ka votuar sot pro ndryshimeve në ligjin për Policinë e Shtetit. Ministri i Brendshëm, Sandër Lleshaj shpjegoi se vetëm komisarët mund të kërkojnë përgjimet ambientale.
“Ligji aktualisht sot siç është në përgjithësi flet për përgjim ambiental. Ligji i ri është ndryshim tërësor. Nuk flet më për përgjim. Është super rregulluar dhe është modifikuar në ekstremin e mundshëm. Vetëm komisarët mund të kërkojnë përgjim ambiental. Përgjimet ambientale nuk janë përdorur nga policia“, deklaroi Lleshaj.
Ndryshimet në projektligjin për Policinë e Shtetit. Ministri i Brendshëm Sandër Lleshaj i kishte njoftuar dy ditë më parë në Komisionin për Sigurinë Kombëtare, ku është reflektuar në bazë të diskutimeve dhe komenteve të ardhura nga institucionet e tjera.
Një nga pikat më të diskutuara, që është cilësuar si ndërhyrje në ligjin e përgjimeve nga vetë Prokurori i Përgjithshëm, është “përgjimi ambiental”, i cili zëvendësohet me “mbikëqyrje”.“Që nga takimi i fundit lidhur me ligjin për Policinë e Shtetit, ne jemi marrë, kemi reflektuar në respekt të diskutimeve që u bënë në këtë Komision dhe të komenteve të ardhura nga agjencitë e tjera, nga institucionet e tjera, me qëllim që drafti i ligjit të arrijë në atë trajtë që të gjejë konsensusin e përgjithshëm dhe miratimin e këtij komisioni.
Në thelb janë bërë ndryshime sa i përket terminologjisë, për arsye se pati disa keqkuptime që besoj që ishin të argumentuara sa i përket terminologjisë. Për arsye se shumë veta e keqkuptuan si një ndërhyrje në ligjin e përgjimeve, dhe për dhënie atributesh, kompetencash policisë për të kryer përgjime, me iniciativën e vet dhe nën përgjegjësinë e vet.
Është rishikuar terminologjia duke zëvendësuar fjalën “përgjim ambiental”, me “mbikëqyrje”. Kjo besoj e ka zëvendësuar në thelb shqetësimin e disa kolegëve të komisionit dhe të disa përfaqësueseve të institucioneve”, ka deklaruar Lleshaj.
Në projektligjin e ri thuhet se nga policia mund të kryhen përgjime ambientale me lejen e prokurorit vetëm për rastet kur do të survejojnë ambientet private, ndërsa në ambientet publike mjafton një miratimi i strukturave të policisë.
Një nen tjetër u lejon punonjësve të policisë të ngrihen në detyra shtetërore, me kushtin për të hequr dorë nga statusi i policit e për t’u punësuar si civil, me ndryshimet e reja.
“Ligji i sotëm për policinë e shtetit ka një nen që shumë pak e dinë. Neni që përcakton statusin e policisë së shtetit. Aty thotë se punonjësi i policisë së shtetit gëzon statusin e nëpunësit civil. Nuk është ushtarak. Nuk është se do të ketë humbje ose rrezikim nga ky nen”, tha Lleshaj.
Ministri shtoi se do të paraqitet edhe një nismë tjetër për sigurinë në shkolla, ku policët në moshë të thyer do të shërbejnë si punonjës sigurie.
/Gazeta Reforma/
