Komisioni për Çështjet Ligjore, Administratën Publike dhe të Drejtat e Njeriut në mbledhjen e radhës shqyrtoi një akt normativ dhe dy projekligje.
Gjatë mbledhjes së sotme të Komisionit, u shqyrtua fillimisht Akti Normativ me fuqinë e ligjit nr. 31, datë 7.10.2020 “Për faljen e masave administrative me karakter ndëshkues të vendosura gjatë periudhës së infeksionit të shkaktuar nga COVID-19 dhe familjeve të dëmtuara nga fatkeqësitë natyrore”, i cili u relatua nga deputetja e P, Klotilda Bushka.
Ndërkohë të ftuar në mbledhjen e sotme ishin edhe Romina Kuko, zëvendësministre e Brendshme, Vasilika Vjero, zëvendësministre e Financave dhe Ekonomisë, Mira Rakacolli, zëvendësministre e Shëndetësisë dhe Mbrojtjes Sociale, si dhe Merita Xhafaj, Drejtoreshë e Përgjithshme në MSHMS.
Zëvendësministrja e Brendshme Kuko sqaroi se nisma është iniciativë e përbashkët e 3 ministrive dhe synon faljen e masave administrative të vendosura gjatë periudhës së pandemisë, por edhe ato të vendosura nga strukturat e njësive të vetëqeverisjes vendore ndaj famijeve të prekura nga tërmetet e datës 21 shtator dhe 26 nëntor 2019 për riparimin/rindërtimin e banesave individuale.
Kujtojmë se në total janë falur 7200 gjoba që u vendosën gjatë periudhës së karantinës, por dhe më tej, deri në tetor 2020.
