Sektori i ndërtimit ka hyrë në një fazë intensive me ndërtime shumëkatëshe në qytete dhe komplekse në bregdet, por Shqipëria ende nuk ka adoptuar standardet e Eurokodeve për mbrojtjen nga tërmeti dhe zjarri.
Pas tërmetit të 2019-ës, Akademia e Shkencave mori përsipër hartimin e legjislacionit me Eurokodet, por procesi nuk ka përfunduar. Nga të dhënat e brendshme, numri i zjarreve në banesa shkon në 350-400 në vit.
Inxhinieri Nikolin Risilia, specialist për projektimin dhe zbatimin e sistemeve kundër zjarrit, thekson se adoptimi i Kodeve është emergjent për shkak të ndërtimeve shumëkatëshe. Grupet e interesit si arkitektët, siguruesit, ndërtuesit, zjarrfikësit, duhet të ndërgjegjësohen për rreziqet.
Ndërtesat më të rrezikuara në kryeqytet janë ato shumëkatëshe me shërbime në katet e para. Më të sigurta janë pallatet e vjetra 3-4 katëshe, me shkallë të gjera dhe ventilim natyror. Rrezik paraqesin parkimet nëntokësore me makina elektrike, konviktet dhe qendrat tregtare.
Pagesat për sigurime kundër zjarrit në 2024 arritën në 2.2 miliardë lekë, me rritje vjetore 4.3%. Dëmet e paguara në 2023-2024 ishin përkatësisht 536 dhe 643 milionë lekë, ndërsa në 2021-2022 ishin 889 milionë dhe 1.1 miliardë lekë. Pronat sigurohen kryesisht nga bizneset, ndërsa qytetarët e kanë të panjohur këtë kulturë.
/gazetareforma.com
