Ministrja për Çështje Evropiane e Malit të Zi, Majda Gorçeviç, ka deklaruar publikisht se shteti i saj do ta përkrahë anëtarësimin e Kosovës në Këshill të Evropës në muajin maj.
Gorçeviç bashkë me zëvendëskryeministrin e Kosovës, Besnik Bislimi, dolën në një konferencë për mediat pas nënshkrimit të marrëveshjes për Programin e Bashkëpunimit Ndërkufitar IPA III.
Përtej marrëveshjes ajo foli edhe lidhur me votimin kundër të deputetëtve të Malit të Zi për anëtarësimin e Kosovës në Këshillin e Evropës. Ajo u shpreh se vota e disa deputetëve nuk është domosdoshmërisht qëndrimi i shtetit malazez.
“Votimi i disa deputetëve nuk do të thotë domosdoshmërisë qëndrimin e qeverisë. Mali i Zi në maj do ta përkrahë Kosovën për anëtarësim në Këshillin e Evropës”, ka deklaruar ajo.
