Ministrja e Arsimit, Evis Kushi ka reaguar për protestën e maturantëve të cilët kanë pasur pakqnaqësi për nivelin e vështirësisë së provimit. Përmes një reagimi në rrjetin social ‘Facebook’, Kushi ka sqaruar maturantët se nëse rezulton që niveli i vështirësisë është më i lartë sesa është parashkikuar, do të rishikohet shpërndarja e pikëve.
Postimi i plotë:
Të dashur maturantë.
Siç ju kemi premtuar, ne do të jemi gjithmonë në mbështetjen tuaj. Në këto momente, jemi duke vlerësuar edhe një herë me grupet e ekspertëve nivelin e vështirësisë së çdo pyetjeje në testin e matematikës. Dhe në rast se na rezulton që ai e tejkalon nivelin e parashikuar, të cilin e kushtëzon mënyra e zhvillimit të mësimit gjatë këtij viti shkollor, pa dyshim që ne do ta rishikojmë shpërndarjen e pikëve në test dhe mënyrën e vlerësimit. Ju uroj shumë suksese për provimin e radhës!
Deklarata e ministres Kushi për provimet e Maturës Shtetërore nuk i ka qetësuar aspak maturantët. Teksa ministrja tha se do të rishikohet niveli i vështirësisë dhe i shpërndarjes së pikëve, maturantët nuk janë ndaluar por janë zhvendosur përpara Qendrës së Shërbimeve Arsimore, QSHA.
Mëngjesin e sotëm, përfaqësueset e QSHA hodhën poshtë pretendimet e maturantëve, pasi sipas tyre teza ishte e thjeshtë dhe asnjë nuk ishte e jashtë programit, por mesa duket, maturantët nuk janë dakortësuar.
