Çdo gjë po bëhet gati që shkollat të hapen në datën 1 shtator. Pavarësisht përhapjes së variantit Delta dhe rritjes së rasteve me Covid, duket se nxënësit do të kthehen sërish nëpër banka dhe mësimi nuk do të zhvillohet online.
Ministrja e Arsimit, Evis Kushi ka ndarë disa foto nga procesi i dezinfektimit të shkollave në mënyrë që cdo gjë të jetë gati në 1 shtator për nxënësit që do të zhvillojnë mësimin plotësues. Kushi shpreh mirënjohje për të gjithë punonjësit e qeverisjes vendore që janë angazhuar në këtë proces.
“Mirënjohje për punonjësit e njësive të vetëqeverisjes vendore, të cilët tashmë kanë filluar rregullimin e mjediseve të brendshme e të jashtme të shkollave tona, lyerjen, dezinfektimin, e plot punë të tjera në mënyrë që çdo gjë të jetë gati më datë 1 shtator për nxënësit që do të zhvillojnë mësimin plotësues”, shkruan ministrja e Arsimit.
Kujtojmë që dy ditë më parë ministrja Kushi njoftoi se ishte vendosur që nxënësit e arsimit parauniversitar të kryenin konsultime dy javë para fillimit të vitit shkollor në mënyrë që të plotësojnë mangësitë që mund të kenë pasur nga viti i kaluar. Temat do të jenë sipas nevojave të identifikuara në çdo shkollë dhe nxësnësit do të jenë të lirë t’i ndjekin sipas nevojave të tyre.
