Ministrja e Bujqësisë Frida Krifca ka sqaruar deklaratën e saj, e cila bërë bujë të madhe në rrjetet sociale, duke u kthyer dhe në një “burim memesh”.
Ajo deklaroi 4 ditë më parë gjatë komisionit parlamentar për Veprimtarinë Prodhuese se do të hapet një Akademi barinjsh.
Sot Krifca ka thënë se këtë gjë nuk e ka shpikur ajo dhe qeveria shqiptare, por se e kanë marrë si ide nga vende të tjera si Zvicra dhe Spanja.
Ajo u shpreh se deklarata e saj është keqkuptuar. “Një keqkuptim i ndodhur dhe me artikulimin e fjalës akademi”, tha Krifca.
“Mund të bëj një sqarim në keqkuptimin e ndodhur në mbledhjen e kaluar. Një keqkuptim i ndodhur dhe me artikulimin e fjalës akademi. Në lidhje me fjalën akademi kjo është një eksperiencë që nuk e kemi shpikur por e kemi parë në disa vende, Zvicra Anglia Spanja e kanë një qasje drejt zgjidhjes së problemit të migrimit të njerëzve nga profesioni i bujkut të cilët po përpiqen ti adresojnë duke dhënë mbështetje në formimin e tyre për ti angazhuar në këtë profesion”, deklaroi ministrja.
Më tej ajo bëri me dije se ideja është konsultuar dhe me donatorët dhe shtoi se “si drejtoreshë e AZHBE jam konsultuar dhe me universitetin bujqësor, që në 2018 kemi filluar të mbështesim stanet”.
“Është një program që do të vazhdojmë ta përforcojmë dhe ta ndihmojmë për të ruajtur traditën në fusha të tilla. Kjo jo e shprehur vetëm në blegtori dhe zanatin e barinjve por dhe në zanatin e fermerëve të rinj që i bashkohen trupës së bujqësisë. Ky ishte sqarimi që doja të bëja”, tha ajo.
