Situata e ndërtimit të HEC-it në Kanionet e Holtës vazhdon të jetë ende e paqartë, sidomos tani që edhe Ministria e Mjedisit po shpreh rezerva për dhënien e lejes për ndërtimin e tij.
Po mesa duket pavarësisht hezitimit të ministrisë, Agjencia Kombëtare e Zonave të Mbrojtura thotë se ndërtimi është pranë kanioneve, por jashtë zonës së mbrojtur.
Megjithatë pas protestës së banorëve dhe ambientalistëve, tashmë edhe deputetët e PS shprehen kundër ndërtimit të HEC- it në këtë zonë.
Ajo që vihet re në dokumentet e marrjes së lejes janë përplasjet që kanë institucionet mes njëri – tjetrit. Drejtoria teknike në ministrinë e Mjedisit ka shprehur rezerva mbi situatën.
Ndërsa Drejtoria Rajonale e Mjedisit, qarku Elbasan, shprehet parimisht dakord. Nga ana tjetër agjencia kombëtare e zonave të mbrojtura pranon se është kërkuar rishqyrtim i situatës për zbatimin e projektit HEC Strori.
Por në kthimin e përgjigjes konstatohet se bazuar në raportin teknik dhe koordinatat e ndryshuara nga subjekti konstaton se sipërfaqa e kërkuar për zbatimin e këtij projekti ndodhet jashtë monumentit të natyrës “Kanioni i Holtës”.
Madje shtohet se meqenëse projekti do të zhvillohet pranë monumentit të natyrës kërkojmë nga subjekti të respektojë kuotën e veprës së marrjes dhe depozitimit i inerteve të kryhet jashtë kanionit.
Pavarësisht kësaj Agjencia e Zhvillimit të territorit ka miratuar lejen e ndërtimit e cila mban firmën e kryeministrit Rama dhe ministrit Gjiknuri
Ndërkohë protesta e ambientalistëve dhe banorëve të Gramshit për kanionët e Holtës vuri në lëvizje deputetët. Opozita kërkon anulimin ndërsa 7 deputetët e maxhorancës kanë ndërmarrë nismën për të kërkuar verifikimin e procedurave.
