Dy vjet më parë, Ministria e Mbrojtjes nisi një nismë për të ofruar një paketë sociale për ushtarakët, përfshirë trajtime shëndetësore, dentare, dietat ushqimore, dhe përmirësime në kushtet e punës.
Për këtë nismë, vitin e kaluar u shpenzuan 860 mijë euro për laboratorët dhe rikonstruksionin e kabineteve dentare.
Por ky investim është vetëm fillimi i një shpenzimi të madh, pasi për këtë vit janë planifikuar 4.2 milionë euro për blerjen e kiteve dhe reagentëve mjekësorë, si dhe materiale dentare për ushtarët.
Ky shpenzim ka ngjallur kritika, sidomos për faktin që shëndetësia në Shqipëri, sipas legjendës të njohur, duhet të jetë “falas”, duke përfshirë edhe testet dhe analizat për ushtarakët mbi 35 vjeç.
Pavarësisht kësaj, Ministria e Mbrojtjes ka zgjedhur të shpenzojë sërish fonde të mëdha për shërbime mjekësore dhe dentare, çka duket se është një shpenzim tepër i lartë.
Një tjetër shqetësim ka lindur për tenderin e shpallur për blerjen e materialeve dentare, ku fituese doli një kompani, Moto Mania, që ka një aktivitet të kufizuar në tregtinë e materialeve dentare. Kompania ka pasur bilance modeste dhe është kritikur për mungesë eksperiencës në këtë fushë.
Ministri i Mbrojtjes, Pirro Vengu, ka refuzuar të japë një përgjigje lidhur me këto shpenzime, duke lënë vend për dyshime mbi transparencën dhe arsyeshmërinë e përdorimit të fondeve publike.
