Ditën e sotme Ministria për Evropën dhe Punët e Jashtme ka njoftuar se edhe për 14 ditë të tjera kufiri grek do të jetë i mbyllur për shqiptarët. Më saktë nga data 1-15 shtator 2020, mbetet në fuqi kufizimi i hyrjes për shtetasit shqiptarë në tokën greke.
Në njoftimin e MEPJ-së thuhet se deri më 15 shtator shqiptarët që duan të futen në shtetin grek duhet të kenë bërë tamponin dhe aplikimin online. Gjithashtu mbetet në fuqi kufizimi i numrit të lejuar të personave që mund të kalojnë kufirin, pra nga pika doganore e Kapshticës do të kalojnë 300 vetë në ditë, ndërsa nga Kakavija 750 persona në ditë.
Njoftimi i MEPJ:
Ministria për Evropën dhe Punët e Jashtme njofton mbi regjimin e lëvizjes nga Shqipëria drejt shtetit grek për periudhën 1 – 15 shtator 2020, në kuadër të masave kundër Covid-19, si më poshtë:
– Mbetet në fuqi kufizimi i lidhjeve detare dhe ajrore me Shqipërinë dhe Maqedoninë e Veriut. Keshtu, fluturimet drejt/ nga këto vende bëhen vetëm nga aeroporti “Eleftherios Venizelos”;
– Mbetet në fuqi kufizimi i numrit të personave që hyjnë në dite nga PKK të Kakavijës (750 vetë) dhe Kapshtices (300 vetë);
– Mbetet në fuqi deri më 19.09.2020 aplikimi i kontrolleve paraprake përmes testit negativ PCR 72 orë para mbërritjes në vend, për personat që mbërrijnë në aeroport dhe nga pikat tokesore nga Shqipëria.
