Reshjet e dendura të shiut e të dëborës kanë bërë që të rritet niveli i ujit në rezervuare, megjithatë moskujdesi për digat mund të rrezikojë çarjen e tyre.
Në parlament Ministria e Energjetikës ka paraqitur një raport të plotë të gjendjes së 640 digave që rrezikojnë të çahen e të përmbysin gjithë zonën përreth, duke përfshirë këtu edhe fshatra të banuar.
Situata është konsideruar alarmante pavarësisht ndërhyrjeve që janë bërë deri më tani.
“Ka ndërtime me leje, pa leje që e ndërlikojnë situatën. Por ai studim që do bëhet nga Komiteti Kombëtar i Digave do përcaktojë se në cilat diga duhet ndërhyrë”, ka thënë Agim Bregasi, Drejtor në Ministrinë e Infrastrukturës dhe Energjisë.
Ashtu siç edhe e përmendëm, janë 640 diga në total, në të gjithë vendin, të cilat rezultojnë të amortizuara dhe fondet e dhëna për riparim viteve të fundit nuk kanë dhënë asnjë efekt.
Përpos Drejtorit të Ministrisë së Infrastrukturës dhe Energjisë kanë folur edhe deputetë të majtë, të cilët kanë kërkuar me ngulm një skanim të plotë dhe të saktë të situatës.
Rezervuari i Kasharit ka një problem shumë të madh që është pranë familjeve dhe merr përpara fshatin deri tek hekurudhat”, Tatja Nurçe Deputete e PS.
Ndërsa Ilir Beqaj është shprehur: “Situata e digave është më komplekse në Shqipëri. Unë mendoj se ju keni për detyrë parësore ta rishikoni këtë rregullore.”
Ndarja e re territoriale ka sjellë një fakt të tillë që rezervuarët janë nën administrimin e bashkive, por për shkak të mungesës së fondeve dhe këto të fundit nuk kanë parashikuar investime për mirëmbajtjen e tyre.
