Ministri i Jashtëm italian Luigi Di Maio, ka marrë fyerje dhe kërcënime me jetë në rrjetet sociale.
Mediat vendase kanë publikuar disa komente kërcënuese ndaj Ministrit të Jashtëm, të bëra në Twitter nga një person me profilin anonim ‘’Carla’’, që ka shkruar duke etiketuar profilin zyrtar të Luigi Di Maio-s:
“Ne duam që ju të vdisni. Luigi Di Maio të duam të vdekur së bashku me të gjithë napolitanët. Luigi Di Maio i vdekur.”- këto janë disa nga komentet për Di Maion.
Di Maio ka lindur në Avellino, shumë afër Napolit dhe përveç kërcënimit për të si një figurë e rendësishme publike duket dhe një koment urrejtjeje edhe ndaj napolitanëve.
Lëvizja 5 Yje ka shprehur solidaritet për numrin një të diplomacisë italiane, ndërkohë që anëtarë të qeverisë Conte po kërkojnë që Policia të zbardhë dhe të kapë autorët e këtyre thirrjeve kërcënuese.
Ministrja për Administratën Publike Franceska Dadone ka kërkuar garantimin e një klime të qetë politike pasi vendi sot më shumë se kurrë ka nevojë për bashkim.
Edhe zëvendësministrja e Ekonomisë Laura Castelli, ka shprehur mbështetjen e saj për Di Maio, duke shtuar se nuk do të ketë kërcënim që do të ndalë impenjimin e punën e kësaj qeverie.
Di Maio është një emër i njohur për publikun shqiptar, pasi ai ka pritur edhe 2 grupet e infermierëve e mjekëve shqiptarë që shkuan në Itali në muajin mars për tu ardhur në ndihmë kolegëve përtij Adriatikut.
Ai është shprehur shumë mirënjohës ndaj popullit shqiptar në rrjetet sociale, teksa në një intervistë për Opinion disa muaj më parë, tha se italianët kishin mbetur pa fjalë.
