Gjatë turit të takimeve në Drejtoritë Vendore të Policisë, Ministri i Brendshëm Taulant Balla kishte një ndalesë të rëndësishme me drejtuesit e Policisë së kryeqytetit. Në këtë takim, ai inkurajoi strukturat e Policisë në Tiranë të angazhohen në mënyrë të veçantë dhe të rrisin përpjekjet për të garantuar më shumë rezultate dhe siguri të shtuar.
Me ardhjen e muajve verorë, kur numri i vizitorëve dhe turistëve të huaj është në rritje, ministri theksoi rëndësinë e pranisë aktive të forcave të policisë, si të rendit ashtu edhe të rrugës, në terren për të ndihmuar dhe parandaluar çdo incident.
Përveç kësaj, Ministri Balla shprehu nevojën për të përshpejtuar revolucionin Digjital në Policinë e Shtetit, me qëllim të përmirësimit të ritmit dhe efikasitetit të veprimtarisë së saj. Ai theksoi vënien në qendër të vëmendjes shqetësimt dhe kërkesat e qytetarëve. Sipas ministrit, kjo është një mënyrë për të siguruar se Policia e Shtetit është një partner i pandashëm dhe i vlefshëm për të gjithë qytetarët, pasi ata janë jo vetëm arsyeja e ekzistencës së saj, por edhe partnerë të pazëvendësueshëm në kryerjen e misionit të saj.
“Revolucioni Digjital në Policinë e Shtetit do të duhet të çohet përpara me një ritëm dhe efikasitet shumë më të lartë se deri tani dhe Komisariati Digjital do të marrë një peshë dhe rëndësi të dorës së parë. Ai aplikacion duhet të jetë porta ku çdo qytetar jo vetëm mund të hyjë nga çdo smartfon apo kompjuter, por edhe të marrë përgjigje të shpejtë, jo vetëm me fjalë në të gjitha rastet, por edhe me vepra në çdo rast që ankesa është e drejtë”, thekoi Balla.
Ministri tërhoqi vëmendjen e Policisë për të bërë më shumë dhe rritur gamën e shërbimeve që u ofrohen qytetarëve online.
“Në kohën kur qeveria po punon për të futur inteligjencën artificiale në platformën e-albania, në procesin e Integrimit Europian, në procesin e tenderimeve publike dhe të tjerë sektorë dhe kur dikastere të ndryshme kanë bërë kapërcime të mëdha në rrugën e Revolucionit Digjital, Policia e Shtetit nga një pararojë e digjitalizimit sot ka mbetur pas”, nënvizoi Balla.
