Ministri i Brendshëm, Ervin Hoxha, ka bërë propozimin për Ilir Prodën si kandidatin për postin e Drejtorit të Përgjithshëm të Policisë së Shtetit. Njoftimi zyrtar nga Ministria e Brendshme tregon se, në përputhje me ligjin Nr. 82/2024 “Për Policinë e Shtetit” dhe Udhëzimin Nr. 160 të Ministrit të Brendshëm, është shpallur thirrja publike për aplikim për këtë pozicion.
Sipas parashikimeve të ligjit, Komisioni i Posaçëm ka zhvilluar seanca dëgjimore për 11 kandidatët e kualifikuar, duke u angazhuar për vlerësimin e tyre. Seancat janë mbikëqyrur nga misionet partnere të Ministrisë së Brendshme dhe Policisë, si ICITAP dhe EU4LEA.
Gjatë këtij procesi, komisioni ka realizuar verifikimin e pastërtisë së figurës për të gjithë kandidatët, duke kërkuar të dhëna nga organet ligjzbatuese, përfshirë Prokurorinë e Posaçme Kundër Korrupsionit dhe Krimit të Organizuar (SPAK), Prokurorinë e Përgjithshme, dhe Shërbimin Informativ Shtetëror (SHISH).
Më 27 Shtator 2024, Komisioni i Posaçëm i dorëzoi Ministrit të Brendshëm një listë me pesë kandidatët më të vlerësuar, të renditur si më poshtë:
- Z. Altin Mena
- Z. Ardian Çipa
- Z. Ilir Proda
- Z. Neritan Nallbati
- Z. Skënder Hita
Sipas njoftimit, Hoxha do t’i paraqesë Këshillit të Ministrave, z. Ilir Proda si kandidaturën për Drejtor të Përgjithshëm të Policisë së Shtetit. Vendimi për këtë kandidaturë pritet të merret në mbledhjen e ardhshme të Qeverisë.
