Protestat e dhjetorit të vitit të kaluar për vrasjen e të riut Klodian Rasha nga policia, hapën shumë debat për pjesëmarrjen e të miturve dhe dhunën e përdorur. Në protestat që zgjatën thuajse një javë policia përdori gazë lotsjellës për të shpërndarë turmat dhe arrestoi dhjetra persona, mes tyre edhe të mitur. Këto pamje u transmetuan kudo, madje janë të shënuara edhe në raporte zyrtare. Por ministry i Brendshëm, Bledi Çuçi nuk mendon kështu. Sot në parlament ai ka deklaruar se policia ka përdorur të gjitha mënyrat që kanë qenë në përputhje me ligjin dhe ndaj të miturve nuk ka pasur dhunë.
“Në total janë 46 punonjës policie të dëmtuar gjatë protestave, 8 policë të Drejtorisë Vendore të Policisë Tiranë, 2 të Policisë së Shkodrës dhe pjesa tjetër punonjës të FNSH. Procedime penale për tubim të paligjshëm janë 578 persona, 97 të arrestuar, të mitur nga 14-18 vjeç, 4 persona. Proceduar në gjendje të lirë 470 persona, në kërkim 8 persona. Nga mosha 14-17 janë 215 persona të proceduar. Mbi 16 vjec 5 persona”, tha Çuçi ndër të tjera.
Por raportet e Avokatit të Popullit tregojnë të kundërtën.
“Gjithashtu Avokati i Popullit ka konstatuar se përgjatë shoqërimeve në Polici të pjesëmarrësve në protestat e fundit, janë shoqëruar edhe disa të mitur nën moshën 14 vjeç dhe se procedurat e shoqërimit për ta kanë paraqitur disa probleme për të cilat do të kryhet një hetim i thelluar.”, thuhet në raportin e datës 11 dhjetor.
https://www.facebook.com/avokatipopullit/posts/3227331327371118
Ndërkohë, në raportin e datës 14 dhjetor thuhet: “- Në Drejtorinë Vendore të Policisë Tiranë, janë shoqëruar 2 persona, nga të cilët nga të cilët nuk ka pasur persona në moshë të mitur.
– Në Komisariatin e Policisë Nr.1, janë shoqëruar gjithsej 16 persona, nga të cilët 1 në moshë të mitur si dhe 2 vajza.
– Në Komisariatin e Policisë Nr.2, janë shoqëruar gjithsej 10 persona, nga të cilët 3 në moshë të mitur dhe 1 vajzë.
– Në Komisariatin e Policisë Nr.3, janë shoqëruar gjithsej 18 persona, nga të cilët 6 në moshë të mitur.
– Në Komisariatin e Policisë Nr.4, janë shoqëruar gjithsej 4 persona, nga të cilët nuk ka pasur persona në moshë të mitur.
– Në Komisariatet e Policisë Nr.5 dhe Nr.6 nuk ka pasur persona të shoqëruar.
Në intervistat e zhvilluara me përfaqësuesit e institucionit të Avokatit të Popullit, disa prej të shoqëruarve pretenduan se kanë marrë pjesë në protestë, por nuk kanë kryer veprime të dhunshme ndërsa disa të tjerë pretenduan se kanë qenë kalimtarë të rastit dhe nuk kanë marrë pjesë në protestë. Po kështu, nga personat e shoqëruar pati një numër të kufizuar pretendimesh për ushtrim të dhunës.”
https://www.facebook.com/avokatipopullit/posts/3220403861397198
Klodian Rasha u vra më 8 dhjetor nga një efektiv policive gjë që shkaktoi reagime dhe protesta të shumta në të gjithë vendin.
