Milani i këtij sezoni, pas shumë kohësh i “humbur”, po shkëlqen, jo vetëm për faktin që është i pari në krye të Seria A, por edhe për lojën e bukur dhe kompakte.
Ky grup i fortë lojtarësh, përmirësimi nga ndeshja në ndeshje, pjekuria dhe skuadra solide, idetë e qartë në lojë dhe futbolli i bukur, muaj pa humbur në Serie A, kanë bërë që ky ekip me rikthimin e Ibrahimoviç, të adhurohet sërish.
Milani bëri një tjetër performancë pozitive dhe mposhti 1-2 Sampdorian jashtë fushe (suksesi i shtatë radhazi larg San Siro-s). Edhe Giuseppe Bergomi, ish-kapiteni i famshëm i Interit, nuk i kurseu elozhet për rivalët në prononcimin e dhënë për Sky Sport.
“E vështirë të gjesh momente kur Milani ka vuajtur. Janë skuadra që po luajnë futbollin më të bukur në Itali, vrapojnë më shumë se të tjerët. Sampdoria nuk po arrinte të lidhte dy pasime në pjesën e parë.
Pavarësisht mungesave të Ibrahimovic dhe Kjaer, kuqezinjtë po vazhdojnë të paraqiten mirë. Mendoj se Milani ka lojtarë shumë të fortë, kanë diçka më shumë se të tjerët. Janë realisht një skuadër shumë e fortë“, deklaroi Bergomi./GazetaReforma.com/
