Gazetari i njohur, Milaim Zeka është shprehur sot për Top Channel se kryeministri Albin Kurti ka dorëzuar dorëheqjen pak kohë më parë në ambasadën e SHBA-së në Prishtinë. Sipas tij ambasada nuk e ka pranuar kërkesën e tij.
Zeka u shpreh se Kurti është mes një dileme të madhe, pasi formimin e asociacionit ia kërkon Uashingtoni, ndërsa ai vetë ka ardhur në pushtet duke e kundërshtuar asociacionin e komunave serbe.
Gjatë intervistës për “Top Talk”, Zeka u shpreh se Kurti rrezikon të shpallet “non-grata” nga SHBA dhe Britania e Madhe nëse refuzon asociacionin, madje edhe nëse nuk e pranon Kosova do të shkojë në zgjedhje të parakohshme, ose mund të marrë një paketë të re sanksionesh.
“Albin Kurti ofroi dorëheqjen në ambasadën e SHBA në Prishtinë para pak kohësh, por amerikanët nuk ia pranuan. Albin Kurti nëse pranon asociacionin, digjet nga elektorati i tij, ky ka ardh në pushtet duke kundërshtuar asociacionin. Nëse nuk e përmbush këtë kërkesë, pas 15 janarit presioni do të rritet shumë ndaj Albin Kurtit, dhe Kosova pret një pako të re sanksionesh.
Sipas informacioneve të mija diplomatike, nëse Kurti nuk pranon asociacionin, ne do të shkojmë në zgjedhje të parakohshme, por Albin Kurti rrezikon të shpallet person “non-grata” nga SHBA, BE dhe Britania e Madhe”, tha ndër të tjera gazetari nga Kosova.
