Kryetarja e Lëvizjes Socialiste për Integrim, Monika Kryemadhi ka zhvilluar një takim elektoral për zgjedhjet e 25 prillit, me qytetarët e Kamzës. Me anë të një postimi në rrjetet sociale kryetarja e LSI-së, ka treguar entuziazmin dhe mikpritjen që kanë treguar mbështetësit e kësaj force politike.“Mikpritje madhështore e me zemër për LSI dje në Kamëz”, shkruan Kryemadhi në “Facebook”Ndër të tjera Kryemadhi ka thënë se ndryshimi po vjen përmes kandidatëve të mrekullueshëm të LSI-së në Qarkun e Tiranës.“Ndryshimi po vjen dhe përmes kandidatëve të mrekullueshëm të LSI në Tiranë, fitorja më e madhe u përket qytetarëve! Voto LSI”, shton ajo në postim, ku ka bashkëngjitur edhe një video.
Në videon e publikuar nga Monika Kryemadhi vërehet një varg i gjatë makinash dhe simpatizantët që valëvisin flamujt e LSI-së, teksa janë në pritje të kryetares. Ajo që vihet re si edhe në mitingjet e Bashës është mos respektimi i masave të vendosura nga Komiteti Teknik i Ekspertëve, për pandeminë e COVID-19. Në video vërehet një numër i konsiderueshëm personash pa distanca sociale dhe pa maska, gjithashtu puthje dhe përqafime.
Edhe në vende të tjera ku Kryemadhi ka zhvilluar takime elektorale është vënë re një papërgjegjshmëri e madhe si nga ana e saj ashtu edhe nga ana e vetë qytetarëve të cilët marrin pjesë në tubime të tilla, duke vënë në rrezik jetën e tyre dhe të afërmve të tyre. Nga ana tjetër Monika Kryemadhi që në fillimet e pandemisë ka dal hapur kundër rregullave të marra për parandalimin e saj.
