Në Gjermani, mijëra qytetarë janë bashkuar në marshimet tradicionale të Pashkëve për paqe, duke kërkuar ndaljen e konflikteve të armatosura dhe një politikë të jashtme më të fokusuar në dialog dhe diplomaci.
Në Berlin, afro 2 mijë persona u mblodhën në sheshin Mariannenplatz, në një protestë të organizuar nga disa organizata të shoqërisë civile.
Të pajisur me pankarta dhe slogane që bënin thirrje për ndalimin e eksporteve të armëve dhe zgjidhje paqësore të krizave globale, protestuesit apeluan për një të ardhme më të sigurt dhe më të qëndrueshme.
Mes kërkesave të tyre, dallohej kundërshtimi ndaj vendosjes së raketave amerikane në territorin gjerman dhe kritika ndaj politikave ushtarake.
Ata i kërkuan qeverisë gjermane të angazhohet më shumë në zgjidhje paqësore për krizat ndërkombëtare.
Protesta të ngjashme u zhvilluan edhe në qytetet Hanover, Mynih, Bremen dhe Kassel, ku mesazhi kryesor ishte bashkimi kundër luftës dhe militarizmit.
Marshimet e Pashkëve për paqe përbëjnë një traditë të gjatë në Gjermani, që prej dekadash i bashkon qytetarët në qëndrimin e tyre kundër dhunës dhe përpjekjeve ushtarake në mbarë botën.
