Fushata për shkurtime radikale të punonjësve të qeverisë amerikane, të udhëhequr nga Presidenti Donald Trump dhe këshilltari i tij, Elon Musk, është zgjeruar më tej këtë javë, duke përfshirë humbjen e mijëra vendeve pune në sektore të ndryshëm, që nga armatimi bërthamor deri te kujdesi për veteranët.
Rreth 1,200 deri në 2,000 punonjës të Departamentit të Energjisë u shkarkuan, përfshirë një numër të konsiderueshëm të punonjësve që mbikëqyrin rezervat bërthamore të SHBA-së.
Ky veprim është pjesë e një vale shkurtimesh që ka prekur gjithashtu Departamentin e Çështjeve të Veteranëve, Departamentin e Arsimit dhe Administratën e Biznesit të Vogël.
Zyrtarët e Zyrës së Menaxhimit të Personelit u takuan me agjencitë e qeverisë për t’i këshilluar ato që të shkarkonin punonjësit në periudhë prove, një hap që prek një pjesë të konsiderueshme të 280,000 punonjësve të rinj që janë punësuar gjatë dy viteve të fundit.
Ata janë ende në periudhë prove dhe mund të largohen më lehtë. Po ashtu, janë ndërprerë edhe kontratat e punonjësve me afat të përcaktuar.
Presidenti Trump ka argumentuar se qeveria federale është e fryrë dhe se shumë para po humbasin për shkak të shpërdorimit dhe mashtrimeve.
Ai theksoi gjithashtu se borxhi federal është 36 trilionë dollarë, ndërsa deficiti i vitit të kaluar ishte 1.8 trilionë dollarë, duke sugjeruar se ka një nevojë urgjente për reformimin e administratës.
Nga ana tjetër, ligjvënësit demokratë kanë shprehur shqetësimin se Trump po cenon autoritetin kushtetues të legjislativit mbi shpenzimet federale, ndonëse shumica e kolegëve të tij republikanë kanë mbështetur masat që po merren.
Përgjigja e partisë republikane ka qenë pozitive, me Mike Bost, një ligjvënës republikan, që ka mbrojtur shkurtimeve, duke thënë se ato nuk do të kenë ndikim në ofrimin e shërbimeve për veteranët.
Ndërkohë, shtrirja e plotë e shkurtimeve mbetet ende e paqartë, por më shumë se 6,000 punonjës janë pushuar nga puna këtë javë në shtatë departamente dhe agjenci, sipas raportimeve të agjencisë së lajmeve Reuters dhe medieve të tjera.
