Kompania amerikane Microsoft ka njoftuar se gjatë 45 ditëve të fundit janë aktivizuar fushatat online ruse që synojnë të ndikojnë në zgjedhjet e ardhshme presidenciale në SHBA, megjithëse me një ritëm më të ngadaltë krahasuar me zgjedhjet e kaluara. Sipas Microsoft, llogaritë e lidhura me Rusinë janë duke përhapur përmbajtje që përçajnë opinionin publik amerikan, duke përfshirë kritika ndaj mbështetjes së SHBA-së për Ukrainën, raporton Reuters.
Përgjigja nga ambasada ruse në Washington mungon, ndërsa Kremlini ka deklaruar një muaj më parë se nuk ka ndërmend të ndërhyjë në zgjedhjet presidenciale të SHBA-së. Gjithashtu, Moska ka hedhur poshtë akuzat e SHBA-së për një ndërhyrje të Rusisë në zgjedhjet e vitit 2016.
Microsoft vlerëson se edhe pse aktiviteti i ndërhyrjes ruse aktualisht nuk është aq intensiv, ai mund të intensifikohet në periudhën e ardhshme. Kompania gjithashtu thekson se ka pasur një rritje të mesazheve lidhur me Ukrainën në mediat tradicionale dhe rrjetet sociale gjatë dy muajve të fundit. Sipas Microsoft, një nga qëllimet kryesore të këtyre aktiviteteve është përhapja e dezinformimit në gjuhë të ndryshme përmes internetit, të cilat dyshohet se janë të lidhura me administratën presidenciale ruse.
