Pas vrasjes së 64-vjeçarit Gjovalin Prendi në mbrëmjen e 17 prillit pranë lokalit të tij në Pllanë, familja Prendi ka dalë me një apel të fortë publik, duke përmendur emra konkretë si përgjegjës të masakrës që i mori jetën kryefamiljarit.
Viola Prendi, e bija e viktimës, deklaroi publikisht: “Kërkoj që të vihet drejtësi për kushërinjtë e mi, vëllanë tim, babanë tim. Të gjenden autorët, të kapen dhe të marrin dënimin e merituar.” Ajo akuzoi drejtpërdrejt Ardian Gjeloshin dhe të birin e tij, Klajd Gjeloshi, si organizatorë të vrasjes së të atit dhe të vëllait, Sidorel Prendit, i njohur gjithashtu me emrin Roan Brahimi.
Kjo është humbja e katërt brenda një dekade për familjen Prendi. Në 19 shkurt 2014 u vranë Taulant Prendi dhe Klodian Ndreca. Më 9 maj të vitit 2024, në Athinë u ekzekutua Sidorel Prendi, ndërsa më 17 prill 2025, babai i tij Gjovalini u vra në Shqipëri. Viktima kishte shpresuar se drejtësia do të vepronte për humbjen e të birit dhe nipave, por autorët e krimeve paraprake mbetën të paidentifikuar.
“Ne nuk kemi marrë asnjë kërcënim, babai im jetonte i lirë, dilte në rrugë se thoshte nuk i kam hyrë në hak njeriu,” tregoi Viola, duke përjashtuar mundësinë e kërcënimeve paraprake ndaj babait të saj.
Vetëm një orë pas vrasjes së Gjovalinit, në Tiranë ndodhi një atentat me katër të plagosur, ku u dyshua se objektiv ishte bashkëshortja e Sidorel Prendit. Megjithatë, familja e mohon këtë pistë, pasi e veja ndodhej në Lezhë në atë moment. Sipas Violës, kjo ngjarje ka lënë pasoja të rënda psikologjike te fëmijët e familjes: “Kemi fëmijë që janë të terrorizuar, kanë frikë të shkojnë në shkollë, thonë do na vrasin edhe ne si gjyshin dhe për ne kjo është e tmerrshme.”
Policia ka ngritur hipotezën se vrasja e Gjovalin Prendit mund të ketë lidhje me të kaluarën e të birit të tij, Sidorel Prendi, i cili dyshohet jo zyrtarisht për ngjarje të rënda kriminale si atentati ndaj Brilant Martinajt dhe vrasja e Gentjan Bejtes. Por familja hedh poshtë këto lidhje, duke theksuar se gjithçka nisi nga një konflikt banal për një femër.
“Rivali i vetëm është Ardian Gjeloshi, i biri Klajd Gjeloshi dhe aleatët e tyre. Ata janë organizatorët e vrasjes së babait dhe vëllait tim. I kam deponuar edhe në polici,” theksoi Viola Prendi.
Ajo mohoi gjithashtu përfshirjen e të vëllait në krimet e përfolura në media. Sipas saj, Sidorel Prendi kishte njohje me Ervis Martinajn, por nuk ishte në konflikt me të. “Vëllai im nuk ishte kundërshtar i Martinajt. Ka marrë një telefonatë nga ai, u revoltua. Ka ik e ka takuar dhe është kthyer po atë darkë. Nuk është dhunuar siç thonë. Ka ardhur, kemi vijuar darkën,” sqaroi ajo.
Familja Prendi kërkon zbardhjen e plotë të ngjarjeve që i kanë shkaktuar humbje të njëpasnjëshme ndër vite dhe kërkon që drejtësia të veprojë pa vonesë ndaj autorëve që ata i kanë përmendur me emra.
