Ksenofon Konomi, pronari i tufës së kuajve që u qëlluan me armë gjahu në malin e Llogarasë, ka rrëfyer me lot në sy dhe pikëllim të thellë detajet e ngjarjes së rëndë, duke akuzuar policinë se nuk ka shkuar në vendngjarje pavarësisht denoncimit të tij.
Në një prononcim ai ka treguar se sulmi ndaj kafshëve ka qenë i qëllimshëm dhe se plumbat janë gjetur në trupin e tyre nga veterineri.
“Siç kam thënë dhe para dy javësh, nga 22 kuaj që ishin atje në malin e Llogarasë, janë goditur me armë gjahu, me çifte. Janë gjetur plumbat në trupin dhe kurrizin e kafshëve. Me veterinerin kemi shkuar, përveç policisë që nuk ka ardhur në vendngjarje,” thotë Konomi.
Fillimisht, ai mendoi se kafshët mund të ishin sulmuar nga grabitqarë të egër, por e vërteta e ka tronditur: “Më kanë prekur thellë. Me ata kuaj mbaja familjen dhe punën time, transportoja turistët. M’i vranë vetëm se pinin ujë te lerat. Dua që autorët të ndëshkohen. Fillimisht mund të ishin dyshime se i kanë ngrënë kafshët e egra, po ku ka kafshë të egër me plumb në gojë? Kam shumë për të thënë, po nuk flas dot, jam në gjendje shumë të keqe. Ata kishin tetë vjet atje dhe s’i kishte ngacmuar njeri. Nga na doli kjo kafshë me pushkë në gojë? Zoti qoftë dëshmitar. Çfarë konkurrence?! I qëlluan për 5 kuintal ujë… M’i vranë vetëm se pinë ujë te lerat.”
Sipas Konomit, 22 kuaj janë qëlluar me armë gjahu, katër kanë ngordhur menjëherë, ndërsa të tjerët janë shpërndarë në zonë, disa të plagosur rëndë dhe disa drejt ngordhjes nga plagët.
Ai thotë se ka gjetur mbetje të kuajve pranë lerës dhe në periferi të stanit, me gjurmë gjaku të mpiksur, prova që sipas tij tregojnë se ngjarja ka ndodhur së fundmi.
Megjithëse autoritetet janë njoftuar menjëherë, pronari tregon se policia nuk ka shkuar në vendngjarje për të kryer verifikimet.
Në komunikatën zyrtare, policia ka raportuar vetëm për një kalë të plagosur, ndërsa autori i dyshuar është proceduar në gjendje të lirë.
Konomi thekson se ka qenë gjithmonë bashkëpunues me autoritetet dhe kujton se kuajt e tij janë përdorur edhe për transport dhe ndihmë gjatë zjarreve të verës së kaluar. Ai kërkon që ngjarja të hetohet me urgjencë dhe autorët të përballen me drejtësinë.
