Vendi ynë ditët e fundit është përfshirë nga temperatura tepër të larta. Sinoptikanët njoftuan se Shqipëria e kaloi valën e të nxehtit afrikan dhe temperaturat ekstreme që prekën vendin javët e fundit, mund të rikthehen vetëm në ditë të veçanta përgjatë muajit gusht. Pavarësisht kësaj në vend do të mbizotërojnë vapa, nuk pritet që të ketë reshje shiu, ndërsa për sa i përket parametrave të erës ato do të normalizohen, duke ulur në këtë mënyrë edhe rrezikun e vatrave të zjarrit që kanë “pushtuar” vendin javët e fundit.
Hakil Osmani, meteorologu i Meteoalb ka treguar se përgjatë gushtit temperatura maksimale që mund të shënojë termometri do të jetë 40 gradë Celcius, në ditë të veçanta. Gjithashtu ai ka shtuar se fundjava ka sjellë një rritje të lehtë të temperaturave, por maksimumi që ka arritur është 36 gradë celsius.
Parashikimi i motit nga meteorologu Hakil Osmani:
“Ditën e djeshme kemi pasur një rënie të vlerave termike me 6 gradë celsius. Nga 40 gradë, të premten me 34 gradë celsius. Megjithatë kjo fundjavë sjell një rritje më 2-3 gradë celsius, duke bërë që vlerat të luhaten në 35-36 gradë. Ndërsa vlerat e mëngjesit mbeten të freskëta. Valët e të nxehtit tërhiqen nga territori shqiptar dhe duke e bërë situatën në vend më të favorshme. Edhe në datën 20 gusht vendi do të mbetet në temperatura të larta. Nuk përjashtohen ditë të veçanta që në disa lokalitete të jenë temperaturat edhe afër 40 gradëve.
Për sa i përket reshjeve të shiut kjo fundjavë mbetet në prezencën e kthjellimeve dhe nuk pritet të kemi prezencë të reshjeve në territorin shqiptar. Parametri i erës ka ardhur duke u dobësuar, duke bërë kështu që edhe flakët mos të ndihmohen nga parametri i erës. Mbetet me shpejtësi deri në 45 km në det të hapur, ndërsa në tokë shumë më pak. Edhe fundjava do të jetë me parametër ere të dobët. Për ato që do frekuentojnë bregdetin, moti do të jetë shumë i favorshëm”.
