Presidenti Ilir Meta ka pritur ditën e sotme në një takim Zëvendëskryeministrin e parë të Maqedonisë së Veriut, z.Artan Grubi. Ka qenë Meta që e ka bërë me dije diçka të tilllë në një postim në facebook. Meta ka theksuar rëndësinë e përfshirjes së diasporës shqiptare në procesin e regjistrimit të popullsisë në Maqedoninë e Veriut pasi është përmbajtësor në të drejtat e tyre. Ndër të tjera Meta ka bërë thirrje për forcimin e marrëdhënieve mes Maqedonisë së Veirut dhe Shqipërisë si dy vende fqinje dhe anëtare të NATO-s, në dobi të paqes dhe stabilitetit në rajon.
Postimi i Metës:
Me shumë kënaqësi prita sot në një takim vëllazëror Zëvendëskryeministrin e parë të Maqedonisë së Veriut, z.Artan Grubi dhe delegacionin, që e shoqëronte.
U njoha prej tij me ecurinë e regjistrimit të popullsisë në Maqedoninë e Veriut dhe theksova rëndësinë që ka përfshirja sa më e madhe e diasporës shqiptare në këtë proces.
Përtej aspektit statistikor, regjistrimi i popullsisë do të jetë përmbajtësor në avancimin e të drejtave të shqiptarëve në Maqedoninë e Veriut, ndaj i inkurajoj të gjithë të marrin pjesë në të.
Si dy vende fqinje, aleate në NATO dhe me vizione të përbashkëta euroatlantike, Shqipëria dhe Maqedonia e Veriut do të duhet të forcojnë edhe më shumë marrëdhëniet në dobi të paqes, stabilitetit dhe zhvillimit të rajonit.
