Presidenti Ilir Meta ka reaguar në lidhje me raportin e Europol që e cilëson Shqipërinë si burimin kryesor të trafikimit të kanabisit në Bashkimin Europian. Në një status në Facebook Meta shkruan se droga dhe trafiqet po e rrënojnë Shqipërinë dhe prandaj 25 prilli do të jetë referendum popullor në mënyrë që këto probleme t’i përkasin të shkuarës.
Postimi i Ilir Metës:
Droga dhe trafiqet po ja nxijnë faqen Shqipërisë dhe po e rrënojnë. Këtë e thekson qartë drejtuesja e Europolit, e cila bën përgjegjëse “Rilindjen”. Prandaj 25 Prilli është referendum popullor, që droga dhe trafiqet t’i përkasin të shkuarës
Raporti i publikuar nga drejtuesja e Europol, Catherine De Bolle theksonte se produkti ilegal më i përhapur mbetet kanabisi, që në rastin e Shqipërisë transportohet kryesisht me rrugë detare drejt Italisë. Në raport thuhej se trafikimi i kanabisit nga Shqipëria përbën kërcënim për shoqërinë dhe ekonominë e europës.
“Impakti i tyre te qytetarët, te ekonomia dhe te shteti i së drejtës është tepër i madh. Na duhen veprime të përbashkëta, politika të reja, të rimendojmë se si punojmë. Nuk mjaftojnë vetëm konfiskimet. Këta njerëz po shfrytëzojnë gjithçka nga shoqëria për fitim, pa respekt për jetën,” tha drejtuesja e Europol, Catherine De Bolle.
