Ndryshimi i kufijve të Kosovës është një nga çështjet më të nxehta të momentit që ka bërë që edhe Presidenti Meta nga Shtetet e Bashkuara të shprehi mendimin e tij.
Meta ka thënë se ndryshimi i vetëm i kufijve për të cilin duhet të punojmë ditë e natë në rajonin tonë është zgjerimi i plotë i kufirit evropian në Ballkanin Perëndimor.
“Procesi i Berlinit asnjëherë nuk u hartua me synimin për të zëvendësuar zgjerimin evropian, por u ideua si një mekanizëm nxitës për investime më thelbësore evropiane si dhe bashkëpunim në rajonin tonë. Thellimi dhe zgjerimi evropian kanë ndodhur krah për krah, pa marrë parasysh dyshimet apo hezitimet, të cilat kanë qenë gjithmonë të pranishme”, tha Meta.
Meta i ftuar në Forumin “Transatlantic Leadership Network”, ka marrë fjalën dhe këtë ia ka kushtuar çështjes së Kosovës dhe liberalizimit të vizave.
“Do të doja gjithashtu të ndaleshim e të përqendroheshim të vendimi i mençur dhe i guximshëm i BE-së për ta zbatuar regjimin e lëvizjes pa viza për qytetarët e Kosovës sa më shpejt që të jetë e mundur, dhe në përgjithësi, procesin e shpejtë të anëtarësimit për mbarë rajonin”, u shpreh Presidenti.
