Presidenti Ilir Meta ka nderuar tenorin e famshëm Plácido Domingo me titullin “Kalorës i Urdhrit të Skënderbeut”. Në një status në Facebook, Meta shkruan se prania e kësaj figure të rëndësishme të muzikës dhe operës botërore, si dhe në skenën e Teatrit Kombëtar të Operës, Baletit dhe Ansamblit Popullor, ishte një kënaqësi e veçantë që na nderon. Meta ka shprehur mirënjohjen për tenorin spanjoll për mirënjohjen, mbështetjen dhe bashkëpunimin e ngushtë.
Statusi i plotë nga Meta:
I jemi mirënjohës tenorit të jashtëzakonshëm me famë botërore, Maestro Plácido Domingo, për frymëzimin, mbështetjen dhe bashkëpunimin e ngushtë, që u ka dhënë gjithmonë sopranove dhe tenorëve shqiptarë, të cilët e kanë nderuar kombin tonë me sukseset e tyre në skenat ndërkombëtare, si Inva Mula, Ermonela Jaho, Saimir Pirgu dhe shumë të tjerë.
Prania e kësaj figure të rëndësishme të muzikës dhe operës botërore, si dhe interpretimi i tij i paharrueshëm për artdashësit shqiptarë në skenën e Teatrit Kombëtar të Operës, Baletit dhe Ansamblit Popullor, ishte kënaqësi e veçantë dhe një ngjarje e madhe, që na nderon.
E çmova sot me “Kalorës i Urdhrit të Skënderbeut”, sepse nuk mund të gjenim një Titull më të mirë vlerësimi për Maestro Plácido Domingo, se sa emrin e Heroit tonë Kombëtar, i cili vazhdon edhe pas kaq shekujsh të jetë frymëzim për rrugën europiane të Shqipërisë.
