Presidenti i Republikës së Shqipërisë, Ilir Meta, ka ndaluar në Fier, ku ka folur dhe për ngjarjen që ndodhi në Elbasan. “Vendosa të ndaloj për shkak të një ngjarjeje të papritur të një provokimi të shëmtuar të kryetarit të Bashkisë që provokoi LSI dhe kandidatët e saj duke u përpjekur që të hiqte banderolat. Jo vetëm kaq por siç u informova tani,për orë të tëra kanë refuzuar që të dialogojnë dhe të bashkëpunojnë tregon edhe njëherë përpjekjet për të krijuar incidente të paqena. Kjo është arsyeja që kam ndërhyrë menjëherë. Është e rëndësishme që të evitojmë çdo incident që provokohet nga Rilindja.
Vrasja në Elbasan? Nuk mund të them asgjë për çështjen e Elbasanit. Nuk mund të flas pa pasur të qartë panoramën apo dinamikën e ngjarjeve. Dihet që Elbasani ka qenë dhe mbetet së bashku me Durrësin dy nga qarqet më problematike. Kandidatë të dosjes së Shijakut dhe të Dibrës janë përsëri kandidatë. Ajo që është shqetësuese në Elbasan është se shumica e krimeve zgjedhore që janë denoncuar i takojnë këtij qarku. Prokuroria është tërësisht e njëanshme dhe po kështu kam kërkuar nga kreu i SHISH vëmendje të veçantë. Dihet që policia në Elbasan bëhet palë midis grupimeve rivale por gjithmonë të lidhura me Taulantin. Ftoj organet ligjzbatuese të shkëpusin çdo kontakt apo preferencë partiake.
Do mbajnë përgjegjësi. Vendi mbi të gjitha nuk ka nevojë për asnjë lloj cenimi të standardeve zgjedhore. Dhe kaq sa kanë ndodhur janë cenuar mjaft. Të nisen të gjithë drejt 25 prillit, votat e tyre do numërohen pikë për pikë. Çdo njeri në administratë që përfshihet në krim zgjedhor, përjetësisht nuk do ketë më vend në administratën publike. Nuk ka gjë më të shenjtë se vota e lirë dhe e barabartë. Administrata është aty për t’i shërbyer qytetarëve”, u shpreh Meta.
