Presidenti Ilir Meta është shprehur kundër ndryshimeve kushtetuese për hapjen e listave dhe koalicioneve parazgjedhore, të cilat mazhoranca socialiste synon t’i miratojë më 30 korrik, ndërsa opozita e bashkuar shprehet kundër.
Në takimin që zhvilloi me ambasadorët e shteteve anëtare të Bashkimit Evropian, Meta theksoi se çdo prekje e njëanshme e Kushtetutës do të konsiderohet si akt i papranueshëm që synon të asgjesojë shtetin e së drejtës, demokracinë dhe të ardhmen europiane të Shqipërisë.
“Kënaqësi të prisja sot Ambasadorët e Delegacionit të BE, të vendeve anëtare dhe të Mbretërisë së Bashkuar të aktedituar në Tiranë. I sigurova se do të dekretoj menjëherë ndryshimet e Kodit Zgjedhor në respekt të Marrëveshjes konsensuale të 5 qershorit. Theksova rëndësinë e vazhdimit të punës së Këshillit Politik vetëm në frymën e konsensusit dhe gjithëpërfshirjes. I njoha me pozicionin tim të qartë se çdo prekje e njëanshme e Kushtetutës do të konsiderohet si akt i papranueshëm që synon të asgjesojë shtetin e së drejtës, demokracinë dhe të ardhmen europiane të Shqipërisë”, shprehet Presidenti.
Partia Demokratike dhe aleatët kërkojnë më shumë kohë për të diskutuar ndryshime të mundshme kushtetuese, por Partia Socialiste me mbështetjen e opozitës parlamentare kërkojnë t’i kalojnë ato brenda këtij sesioni parlamentar, që përfundon më 30 korrik.
