Para dy ditësh,presidenti Ilir Meta nuk pranoi të dekretonte ligjin për Bashkëqeverisjen, pasi sipas tij ky ligj shkel Kushtetutën dhe autonominë e pushtetit vendor.
Ditën e sotme, Kryeministri Edi Rama ka reaguar për herë të parë për këtë vendim të Metës, duke u shprehur nga Elbasani se ligji do të miratohet menjëherë sapo të mbërrijë në Parlament, duke injoruar në këtë mënyrë institucionin e Presidencës.
“Nëse qytetari nuk do të paguajëe dhe nuk dëshiron të mbajë radhe e ka vetë në dorë. Për 95% të shëërbimeve i gjen online. Vetëm nëse do vetë të vazhdosh me rrugën e vjetër dhe të shkosh e mbash radhe e të kërkosh miq, dreq e tbir, e të paguash, nuk e di si do të të ndihmojë qeveria. Nëse nuk të vjen përgjigja në kohë, atëherë ke në dorë të vësh alarmin me ligj. Është e drejta jote me ligj. Sa të vijë ligji në Kuvend përsëri i kthyer nga zotëria ende në Presidencë, ti e ke me ligj që kërkon të drejtën tënde. Jo vetëm do marrësh të drejtën, por po me ligj zyra përgjegjëse sanksionohet financiarisht për dëmin që të ka shkaktuar“, tha Rama.
Rama ndodhet në Elbasan ditën e sotme ku po flet me qytetarët për ligjin e Bashkëqeverisjes. Më herët në Facebook ai shkruan se ky takim është sensibilizues për t’i treguar qytetarëve lehtësirat që do të sjellë ky ligj.
“Elbasan, Bashkëqeverisja si Ligj i Ri – Takimi i parë sensibilizues për Bashkëqeverisjen si mekanizëm i ri detyrues ligjor, për ta çliruar qytetarin nga pesha e administratës, duke i dhënë akses të plotë në shërbimet administrative përmes smartfonit apo kompjuterit dhe duke e përballur administratën me pasojat e çdo vonese në shërbimin ndaj qytetarit”, shkruan Rama në Facebook.
