Presidenti Ilir Meta doli në një konferencë për mediat mëngjesin e sotëm, ku ka deklaruar se në 30 qershor nuk do të ketë zgjedhje. Madje gjatë fjalës së tij, Meta i ka konsideruar zgjedhjet e 30 qershorit si imagjinare.
Gati në përfundim të kësaj konference ai thumboi kryeministrin Edi Rama, duke thënë se presidenti është esëll gjatë gjithë ditës.
Po ashtu gjatë kësaj konference Meta është pyetur nga gazetarët nëse ka një plan B dhe nëse do të ndërmarrë hapa të tjera për situatën e rëndë politike, ku ndodhet vendi.
Meta është përgjigjur:
“Unë mbetem besimplotë se do të ketë reflektim nga të gjitha palët, do të vijoj të jem i qetë dhe i duruar, Presidenti nuk ndërhyn për të penguar zgjedhje partiake, po padyshim që kjo datë ka rënë, nuk ekziston më. Kush do të bëjë zgjedhje partiake është i lirë që ta bëjë. Në Republikën e Shqipërisë ka vetëm një institucion që e vendos datën e zgjedhjeve.’’
Ai është pyetur nga gazetarët edhe nëse e merr në konsideratë shpërndarjen e Kuvendit.
Kësaj pyetje Ilir Meta i është përgjigjur kështu:
“Presidenti do t’i shërbejë gjithmonë mbrojtjes së Republikës, dhe shpresoj që këtë ta bëjnë të gjithë institucionet e tjera.’’
