Presidenti Ilir Meta ka komentuar situatën zgjedhore dhe skandalin e të dhënave në emisionin “6+1 Vlora”. Meta tha se qeveria po bën çdo gjë për të prishur standardet e zgjedhjeve pasi është edhe palë edhe arbitër. Gjithsesi presidenti deklaroi se ka besim se populli do të marrë në dorë fatet e tij.
“Qeveria po bën çdo gjë në këto zgjedhje për të prishur standardet e tyre, pasi po bën edhe palën edhe arbitrin në fushë. Por jam me besim se populli do marrë në dorë fatet e tij. Ka një tension artificial që vjen nga mazhoranca dhe kjo ndodh per shkak se ndihen pakicë. Ajo kërkon të imponohet përmes marifeteve, por do ta kete te pamundur. Fushata zgjedhore që po zhvillohet nuk është e qetë.
Në 25 prill, qytetarët që po frustrohen çdo ditë nga qeveria do reagojnë me pjesëmarrjen masive në votime.”, u shpreh Meta.
Duke folur për skandalin e të dhënave, Meta u shpreh se patronazhistët nuk janë tregues për shoqëri të lirë, por të partisë-shtet. Ai tha se diçka e tillë është e papranueshme dhe se këto zgjedhje do jenë historike pasi shqiptarët nuk do votojnë kriminelët.
“Patronazhistët nuk janë një tregues pozitiv për një shoqëri europiane dhe të lirë. Ky është tregues i partisë-shtet. Është e papranueshme. Shqiptarët duan ndryshimin dhe do votojnë ndryshimin më 25 prill. Shqiptarët nuk votojnë kriminelët, ato i urrejnë ata. Do jenë zgjedhje historike. Duhet të apelojmë te qytetarët shqiptarët që të ushtrojnë të drejtën e tyre. Kjo është një mundësi e jashtëzakonshme, por është një mundësi jo për 4 vjet, por për 100 vitet e ardhshme”, ka thënë Meta.
