Presidenti Ilir Meta ka nënshkruar sot dekretin për zgjedhjet e reja lokale, që sipas tij do të jenë në 13 tetor. E nga ana tjetër pak minuta më parë kryeministri Edi Rama ironizoi takimet e presidentit Meta, duke i cilësuar si “karnavale politike”
Meta shprehet dhe bën thirrje që të ketë reflektim dhe se e ka pritur të parin kryeministrin Rama që të merrte pjesë në takimin e pati ftuar që ditën e djeshme.
“Dua t’ju njoh me dekretin për datën e re të zgjedhjeve që është 13 Tetori. Unë jam i bindur se nuk do asnjë bashki pa asnjë kandidat. Shpresoj që të ketë reflektim. Jam këtu për të bërë maksimumin dhe jo për të plotësuar tekat e opozitës”, është shprehur presidenti Meta.
Por pa mbaruar ende mirë konferencën për shtyp presidenti Meta, ai që ka reaguar në mënyrë rrufe ka qenë kryeministri Rama, ku thekson se pavarësisht deklaratës së Metës, zgjedhjet janë në 30 qershor.
Presidenti Meta u shpreh se nuk po vepronte për të plotësuar tekat e opozitës, por për të shmangur konfliktin.
Sa i përket faktit që një nga liderët e opozitës është bashkëshortja e tij, Meta u shpreh se nuk ndikohet aspak dhe axhenda e tij është ajo e Presidentit të Republikës.
“Më vjen shumë keq për reagimin e Ramës, por nuk do të humbasë për asnjë moment qetësinë. Nuk e kam për turp që jam burri i Monikës dhe këtë e di e gjithë Shqipëria.
Monikën e kam gjetur në partinë që e drejton sot zoti Rama, por ai e di më mirë se kushdo se unë në të gjitha detyrat që kam pasur di të ndajë anën shoqërore dhe familjare me anën shtetërore. Për mua është tjetër gjë Monika dhe tjetër gjë Republika në këtë detyrë tjetër të rëndësishme që kam. Axhenda ime është axhenda e Presidentit të Republikës së Shqipërisë”, tha Meta, duke e mbyllur me thirrje ndaj Ramës: Edi Reflekto!
