Syri i Kaltër në Delvinë u përfshi nga flakët, duke shkaktuar djegien e një sipërfaqe të konsiderueshme të zonës së mbrojtur. Për vënien nën kontroll të zjarrit u desh ndërhyrja nga ajri me helikopterë.
Për këtë ngjarje ka reaguar nga paraburgimi ish-presidenti Ilir Meta, i cili hodhi dyshime se zjarri mund të ketë qenë i qëllimshëm, me synim hapjen e rrugës për ndërtime dhe betonizim të parkut natyror. Meta iu referua një deklarate të mëparshme të ministres së Turizmit, Mirela Kumbaro, e cila në Parlament kishte folur për një “pikëz të vogël” në zonën e Manastirit të Sarandës që do të jepej për investim strategjik.
“E pamundur që flakët të përhapeshin në një zonë ku çdo ditë ka qindra vizitorë, staf të policisë private, restorante dhe ujë të bollshëm. Edhe vetëm me kova ujë mund të ishte shuar zjarri në shkëndijën e parë” – u shpreh Meta, duke përmendur se ngjarje të ngjashme kanë ndodhur edhe në Shëngjin, ku sipas tij pylli me pisha u dogj për t’i hapur rrugë ndërtimit.
Ai e akuzoi qeverinë për mungesë të politikave parandaluese dhe për mosshpalljen e Gjendjes së Fatkeqësisë Natyrore, duke e quajtur Kryeministrin “armik të mjedisit” dhe “promotor të betonizimit të Tiranës”. Sipas Metës, shkatërrimi i hapësirave të gjelbra dhe zonave të mbrojtura është një strategji e qëllimshme që po dëmton vendin.
“Mos u çudisni që flakët te Syri i Kaltër të kthehen nesër në një ‘pikëz’ betoni si ajo e Manastirit të Sarandës” – përfundoi Meta.
