Presidenti Ilir Meta ka dekretuar datën për mbledhjen e parë të Parlamentit të ri.
Të premten e 10 shtatorit, në orën 10:00, 140 deputetët e dalë nga zgjedhjet e 25 prillit do të mblidhen në legjislaturën X-të të Kuvendit të Shqipërisë.
Kuvendit aktual i mbaron afati në 9 shtator, ndërsa dekreti hyn në fuqi menjëherë,
Pas dy vitesh, në Parlament do të kthehen deputetët e zgjedhur të Partisë Demokratike dhe të LSI-së.
Njoftimi i Presidencës:
REPUBLIKA E SHQIPËRISË PRESIDENTI
D E K R E T PËR THIRRJEN E MBLEDHJES SË KUVENDIT TË PORSAZGJEDHUR TË REPUBLIKËS SË SHQIPËRISË
Në mbështetje të nenit 65 pika 1, 67 pika 1, dhe 93 të Kushtetutës së Republikës së Shqipërisë, pas zhvillimit të zgjedhjeve të përgjithshme për Kuvendin e Republikës së Shqipërisë të datës 25.04.2021, rezultati përfundimtar i të cilave është shpallur nga Komisioni Qendror i Zgjedhjeve përmes Vendimit nr. 21, datë 13.07.2021, të Komisionit Rregullator, si dhe në kushtet kur Legjislaturës së IX-të të Kuvendit, i përfundon mandati në datën 09.09.2021,
D e k r e t o j:
Neni 1
Ditën e premte, në datë 10 shtator 2021, ora 10:00, thirret për t`u mbajtur mbledhja e parë e Legjislaturës së X-të të Kuvendit të Republikës së Shqipërisë.
Neni 2
Ky dekret hyn në fuqi menjëherë.
Nr. Dekretit 13207
Tiranë, më 01.09.2021
PRESIDENTI I REPUBLIKËS
ILIR META
