Ngjarja tronditëse që ndodhi në shkollën “Sotir Gura” në Korçë ka shkaktuar një ndjesi shoku tek prindërit dhe familjarët e nxënësve.
Ata janë shprehur të tronditur nga ngjarja dhe kërkojnë masa më të rrepta për verifikimin dhe përgjegjësinë e çdo mësuesi që integrohet në sistemin arsimor.
“Çfarë të them unë? Në mësues që duhet të edukojë fëmijët dhe të sillet në atë gjendje? Është shumë e rëndë. Kur mësuesit vihen në detyrë duhet të shikohen mirë, të merret CV e tyre, e kaluara, këtë mendoj”, thotë një prind.
“Këto gjëra nuk janë në moment, që bën këtë gjë, është më përpara, jemi shumë të shqetësuar, më dridhet mishi. Nuk është hera e parë që kemi dëgjuar, po themi hajde se mbase marrin masa, po asgjë, prapë vazhdohet”, shprehet një tjetër.
Të mërkurën mësuesi i shkollës 9-vjeçare ‘Sotir Gura’ në Korçë, Bledar Duro është arrestuar nga forcat policore pasi akuzohet se ka ngacmuar seksualisht dy nxënëset e tij me mesazhe në whatsaap.
Dy 14- vjeçaret ngacmoheshin nga mësuesi i tyre prej gati 1 muaji, ku ky i fundit ju dërgonte mesazhe me përmbajtje të rënda.
Nxënëset, së bashku me prindërit e tyre, ju drejtuan policisë së Korçës për të denoncuar rastin e ngacmimeve.
Pas zbardhjes së ngjarjes, mësuesi Bledar Duro u pezullua menjëherë nga detyra.
Po ashtu, mësohet se drejtoria arsimore do të implementojë një plan masash shtesë për të garantuar sigurinë e nxënësve në shkollat e qarkut.
