Tifozët e Barcelonës mund të jenë të qetë sepse Leo Messi nuk do të largohet nga klubi deri në vitin 2026. Klubi dhe futbollisti e kanë arritur tashmë marrëveshjen dhe e vetmja gjë që mungon është që Presidenti Joan Laporta të arrijë të zvogëlojë masën e pagave të skuadrës në mënyrë që kapiteni të nënshkruajë kontratën e tij të re. Katalanasja “Sport” bën me dije se negociatat që kanë ndodhur muajt e fundit janë mbyllur disa orë më parë dhe pritet që të zyrtarizohet në ditët në vijim.
Lionel Messi ishte pa kontratë që nga 30 qershori, por kishte treguar gjithnjë dëshirën për të qëndruar në klubin blaugran. Bisedimet kishin filluar që në mars, kur president i ri i Barçës u zgjodh Joan Laporta, duke synuar një kontratë që do ta lejonte futbollistin argjentinas ta mbyllë karrierën në “Camp Nou”
Joan Laporta dhe i gjithë bordi drejtues i klubit po punojnë për të arritur një ulje të masës së pagave të ekipit të parë. Për këtë, pronari gjithashtu duhet të negociojë me lojtarë të tjerë të rëndësishëm të ekipit si Gerard Piqué, Sergio Busquets, Jordi Alba dhe Sergi Roberto, të cilëve do t’u kërkohet të heqin dorë nga rreth 40% e pagave të tyre.
