Të dielën në mëngjes, Sheshi i Shën Pjetrit në Vatikan u mbush me mijëra besimtarë për Meshën përmbyllëse të Jubileut të Familjeve, Fëmijëve, Gjyshërve dhe të Moshuarve.
Kremtimi u udhëhoq nga Papa Leo XIV, i cili në predikimin e tij u ndal te vlera e familjes si një burim i unitetit dhe besimit.
Duke iu referuar pasazhit të Ungjillit që përshkruan lutjen e Jezusit në Darkën e Fundit “që të gjithë të jenë një” Papa e cilësoi këtë si dhuratën më të madhe që mund të kërkojmë.
Ai theksoi se ky unitet buron nga dashuria e Zotit, një dashuri pa kufij, e cila është themeli i krijimit dhe shpëtimit. “Dashuria që Zoti ka për secilin prej nesh nuk është më e vogël se ajo për Birin e Tij, Jezusin,” tha Papa.
Më tej, ai kujtoi fjalët e Papa Françeskut për faktin se asnjëri prej nesh nuk zgjodhi të lindte, duke theksuar se jeta jonë nis dhe zhvillohet përmes marrëdhënieve dhe varësisë nga të tjerët.
“Të gjithë ne jemi gjallë sot falë një marrëdhënieje, një akti të lirë mirësie dhe kujdesi njerëzor,” u shpreh ai.
Papa Leo foli edhe për sfidat që përballen familjet sot, ku dashuria dhe mirëkuptimi shpesh tradhtohen. Por, theksoi se lutja e Jezusit vazhdon të na mbështesë dhe të japë kuptim dashurisë që ndajmë si prindër, fëmijë, gjyshër e gjyshe.
Ai nënvizoi se thirrja për unitet nuk do të thotë të jemi të njëjtë, por të jemi bashkë, pavarësisht dallimeve tona.
“Jemi të thirrur të jemi një, në çdo kohë dhe çdo fazë të jetës,” tha Papa, duke shtuar se kjo dashuri duhet të bazohet në Krishtin për të qenë një shenjë paqeje për botën.
Në këtë kontekst, familja është “djepi i së ardhmes së njerëzimit”, ku feja, dashuria dhe vlerat transmetohen brez pas brezi.
Ai solli si shembull çiftet e shenjta që janë lumturuar e kanonizuar së bashku, si Louis dhe Zélie Martin, prindërit e Shën Terezës së Jezusit Fëmijë, dhe familja Ulma nga Polonia.
Papa Leo theksoi se martesa nuk është një ideal abstrakt, por masa e dashurisë së vërtetë mes një burri dhe një gruaje, një dashuri e plotë, besnike dhe frytdhënëse.
Ai i nxiti prindërit të jenë model për fëmijët dhe i kujtoi fëmijët të nderojnë dhe falënderojnë prindërit për dhuratën e jetës. Gjyshërve dhe të moshuarve u dha një mision të qartë: të shërbejnë me mençuri, dhembshuri dhe përulësi.
Në përfundim, Papa Leo theksoi se familja është vendi ku Zoti takon njeriun aty ku besimi ndahet si bukë mbi tryezë dhe dashuria mbillet në zemrat tona.
