Komisioneri për Zgjerimin dhe Fqinjësinë, Oliver Varhelyi, menjëherë pas ardhjes për vizit zyrtare në Tiranë, ku do të prezantojë progres-raportin e Komisionit Evropian për Shqipërinë, ka folur nga foltorja e Kuvendit të Shqipërisë, duke hapur kështu në mënyrë ceremoniale seancën plenare.
Pas fjalës përshëndetëse të kryeparlamentarit Gramoz Ruçi, fjala i ka kaluar komisionerit Varhelyi, që pasi e ka falenderuar Ruçin për fjalët e mira, ka “kritikuar” vendosjen e tij në një karrike ndryshe nga të tjerët, duke u shprehur se në vende të tilla ulen monarkët dhe ai vetë nuk është i tillë.
Ndërkohë për sa i përket çështjes së anëtarësimit të Shqipërisë në BE, ai është shprehur se vendet e Ballkanit Perëndimor janë në fokusin e Komisionit Europian.
“Zoti kryetar, faleminderit për fjalët e mira dhe mikpritjen e ngrohtë, por më dhatë një vend ku ulen monarkët, dhe unë nuk jam i tillë. Është një nder të flasësh në parlamentin që përfaqëson popullin dhe të japësh mesazhin se ne po punojmë për ju që të jeni anëtarë të BE.
Për Komisionin Europian vendet e Ballkanit Perëndimor kanë qenë në fokus gjatë gjithë kohës. Ne kemi bërë disa hapa përpara për të çelur negociatat për anëtarësimin në Bashkimin Europian, ashtu si edhe Maqedonia e Veriut, duke kaluar ngërçin që kishim”, ka thënë në foltoren e Kuvendit, komisioneri Varhelyi.
