Lajmi për largimin e Lionel Messit nga Barcelona ka tronditur gjithë kampin katalanas dhe pas heshtjes së ditës së djeshme, shokët dhe i-shokët e skuadrës kanë filluar t’i japin lamtumirën argjentinasit.
Messi vetë nuk ka reaguar ende, por Xavi, Iniesta, Busquets, Jordi Alba e lojtarë të tjerë të Barcelonës kanë ndarë të gjithë mesazhet e tyre për legjendën e klubit. Ndër mesazhet, më emocionuesi ka qenë ai i Gerard Pique, me të cilin Messi është rritur te “La Massia” (akademia e Barcelonës).
Pique shkruan në Instagram se asgjë nuk do të jetë e njëjtë, as e “Camp Nou” e as në qytet, por realiteti ndonjëherë është shumë i vështirë. Më tej katalanasi kujton arritjet e mëdha me Leo Messin, teksa shprehet i bindur se një ditë ai do të kthehet në klub.
“Asgjë nuk do të jetë më e njëjtë. As Camp Nou, as qyteti i Barcelonës, as ne. Pas më shumë se 20 vitesh në Klub, ti nuk do ta veshësh më fanellën e Barçës. Realiteti, ndonjëherë, është shumë i vështirë .
Ne u takuam në vitin 2000, ishim 13 vjeç dhe kishim një karrierë përpara nesh. Çfarë karriere! Nëse do ta kishim projektuar në atë kohë, ishte e pamundur ta bënim më mirë. Një çmenduri!
Në sezonin tim të parë, pasi u ktheva te Barcelona, ne fituam tripletën dhe ti u bëre lojtari më i mirë i të gjitha kohërave. Nga Rosario, preke qiellin e Romës. Aty filloi legjenda. Ajo që erdhi më pas është histori. Dhe sa mirë ia kemi kaluar!
Tani ti po largohesh, por e di që një ditë do të kthehesh sërish. Ka gjëra që presin për t’u bërë. Argëtohu, shijoje kudo që të shkosh dhe vazhdo të fitosh siç di vetëm ti. Këtu do të na mungosh. Të dua Leo”, shkruan Pique.
