Autoriteti Kombëtar i Ushqimt ka bllokuar dy subjekte në qytetin e Korçës.
Nga kontrolli ka rezultuar se këto subjekte ushtronin aktivitetin në kushte të papërshtatshme higjieno-sanitare, mangësi në dokumentacion, si dhe therje kafshësh në kundërshtim me ligjin.
Gjithashtu iu vendos gjobë edhe një subjekti tjetër.
Për shkeljet e konstatuara, u morën masat administrative, gjobë në vlerën 1.1 milion lekë për 3 subjektet, ndërprerje të aktivitetit për dy prej tyre dhe bllokim i 147 kg mish.
Njoftimi i plotë i AKU-së:
Subjekti “Llazar Vezuli” me aktivitet “Njësi tregtimi” Leskovik-Kolonjë, ushtronte aktivitetin në kushte të papërshtatshme higjeno-sanitare (mungonin analiza e ujit të pijshëm, librezat shëndetësore të punonjësve dhe kontenierët e mbetjeve, masat kundër dëmtuesve ishin të paplota). Për shkeljet e konstatuara, trupa inspektuese mori masat administrative të mëposhtme:
- “Gjobë” me vlerën 300,000 lekë (mungesë të kushteve higjeno-sanitare), si dhe
- “Ndërprerje e menjëhershme e aktivitetit”, deri në plotësimin e mangësive të konstatuara.
Subjekti “Jeton Hida” me aktivitet “Kamping” Sotirë, Korçë, i inspektuar në kushtet e flagrancës, ushtronte aktivitetin në kushte të papërshtatshme higjeno-sanitare në kuzhinë dhe në dhomat frigoriferike, mungonte sistemi i gjurmueshmërisë (21 kg Salcë) dhe produkte “mish” pa vulë dhe pa certifikatë veterinare (20 kg mish qingji, 34 kg mish lope, 38 kg mish derri dhe 34 kg të brendshme lope). Për shkeljet e konstatuara, trupa inspektuese mori masat administrative të mëposhtme:
- “Gjobë” me vlerën 300,000 lekë (mungesë të kushteve higjeno-sanitare),
- “Gjobë” me vlerën 100,000 lekë (mungesë të sistemit të gjurmueshmërisë),
- “Gjobë” me vlerën 100,000 lekë (therje e kafshëve në kundërshtim me ligjin), si dhe
- “Bllokimi i produkte” të pasigurta për konsum në sasinë prej 147 kg, me qëllim asgjesimin e tyre.
Subjekti “Ermir Çollaku” me aktivitet “Piceri” Pogradec, Korçë, ushtronte aktivitetin në kushte higjeno-sanitare të papërshtatshme (mjete dhe pajisje të amortizuara, të papastruara dhe të pahigjienizuara, prani papastërtish në ambientin e kuzhinës, muret e dyshemeja të papastra, mungesë çertifikate DDD dhe prani insektesh në rafte dhe në tavolinën e punës). Për shkeljet e konstatuara, trupa inspektuese mori masat administrative të mëposhtme:
- “Gjobë” me vlerën 300,000 lekë (mungesë të kushteve higjeno-sanitare), si dhe
- “Ndërprerja e menjëhershme e aktivitetit”, deri në plotësimin e mangësive ligjore të konstatuara
